Rundt 60 publikummarar fann vegen til Randøy Grendahus, for å høyra Eigil og vennene hans framføra julekonserten «Heim til jul».
Eigil, som spelte både piano og trekkspel, hadde fått med seg Hanna Søraas Vasshus frå Suldal på song, Aleksander Eriksen Svendsen på saksofon, Peder Kristiansen på perkusjon og Sebastian Hansvold på kontrabass. Dei fire første har kjent kvarandre sidan dei gjekk saman på musikklina på Stavanger Katedralskole, medan Sebastian er ny i gjengen denne hausten.
– Knallbra! Eg er kjempeimponert, utbryt pappa Roger Sjursen, rett etter avsluttingsnummeret «Deilig er jorden».
– Ja, me har jo øvd i to dagar, svarer Eigil lattermildt, og legg til at bandet møttest for første gong på onsdag; same dag som dei spelte konsert i Suldal kyrkje.
Gruppa tok publikum med på ei musikalsk reise gjennom jazz, pop og tradisjonelle juletonar, alt framført med eitt eller anna kreativt innslag.
– Av og til har me mest lyst til å kjøra kvar våre jazz-impronummer. Det er jo det me eigentleg vil, så me snik det berre med, seier Eigil med eit smil.
Publikum fekk mellom anna høyra klassikarar som «Nordnorsk julesalme» og «Julekveldsvisa», i tillegg til meir uventa nummer som «It’s Not Christmas «till You Come Home» og «River».
Hanna Søraas Vasshus song òg ein nydeleg versjon av «Home For Christmas», opphavleg skriven av Maria Mena, med norsk tekst av Bothild Åslaugsdotter Nordsletten.
Konserten blei avslutta med to sterke nummer: «Det lyser i stille grender», framført femstemt a capella av musikarane, og «Deilig er jorden», der heile salen reiste seg og song med. Stemninga i salen blei riktig så høgtideleg, og folk gjekk heim med ein ekstra dose med julesongar friskt i minnet.
