«Lys våken» er eit nasjonalt arrangement, der femteklassingar blir inviterte til ei heilt spesiell oppleving i kyrkja. Vanlegvis skjer arrangementet den første helga i advent, og målet er å la barna utforska kyrkja, leika og læra om advent og kvifor kristne feirar jul.
– Me markerer kyrkja sitt nyttår, som er første sundag i advent. I tillegg lærer me ungane at dei skal vera lys vakne for seg sjølv, for kvarandre og for Gud, forklarer sokneprest Sigrunn Hagen Arnesen, som har vore med på å arrangera «Lys våken» dei siste femten åra.
Arnesen set stor pris på god hjelp frå både foreldra og dei fem konfirmantane som bidrog til å gjennomføra arrangementet.
Gunnar Dalane var blant konfirmantane som stilte opp for dei 18 femteklassingane, som møtte opp frå heile kommunen.
– Først hadde me ein «bli kjent»-leik, og så laga me taco og åt saman, før me gjekk i gymsalen for å spela allemannskanonball. Så gjekk me tilbake i kyrkja for å sjå filmen «Stjernen», og så avslutta me med lystenning, fortel Dalane til Mitt Hjelmeland.
– Kva synest du var det kjekkaste i dag?
– Alt har vore kjekt, seier litlesøster Marit Dalane, som slit med å plukka ut berre éin kjekk aktivitet.
Nokre stader får barna overnatta i kyrkja i samband med «Lys våken», men denne gongen lét det seg ikkje gjera i Årdal kyrkje.
– I fjor var det så få som ville overnatta, og i tillegg skjer det mykje anna, så derfor satsa me heller på éin fredag ettermiddag i år. Og det gjekk bra! Det var god stemning, og alle har vore med og hjelpt kvarandre, avsluttar sokneprest Sigrunn Hagen Arnesen.
