– Kva strikkar du?
– Vottar.
– Eg trudde du nettopp la opp til den der.
– Det går unna, veit du. Eg skal senda dei på torsdag, så eg må ha tid til å tova òg.
Det er tysdag kveld og god stemning på Hjelmeland Samfunnshus. I foajéen sit ni vaksne damer med kvart sitt handarbeid, og drøset går om lokalpolitikk, barnebarn, matoppskrifter, ommøblering, juleførebuingar, og sjølvsagt nokre tips om handarbeid.
– Du skulle berre visst om alle verdensproblem me løyser her…, utbryt Torunn Munthe.
– … for eksempel korleis ein blir kvitt restegarnet, legg Gunn Hausken til, og latteren rungar i rommet.
Gunn Hausken, Tone Kristin L. Munthe og Siv Iren Moen Hausken har det siste året invitert til Spødakaféen på Samfunnshuset éin tysdag i månaden. Frå og med januar 2025 aukar dei frekvensen til annankvar tysdag, og dei har god plass til fleire.
– Ein må ikkje kunna strikka for å vera med, seier Tone Kristin.
– Det går an å hekla òg, seier Gunn, som er i god gang med å hekla eit babyteppe.
– Ein treng faktisk ikkje kunna handarbeid i det heile tatt. Alle er velkomne, viss dei vil vera med, konkluderer Tone Kristin.
I Facebook-gruppa Spødakafé er det heile 45 medlemmer, men vanlegvis er dei berre 12–15 som samlast om gongen.
– Sist gong inviterte Tanja Øvrum Kvame oss til omvising på RySpinn. Då var me ca. 20 rundt bordet, seier Gunn.
Damene rundt bordet i foajéen på Samfunnshuset er einige om at vaksne òg treng uformelle møteplassar. Derfor vil dei frå og med neste år møtast annankvar tysdag; dobbelt så ofte som i år.
– Spødakaféen er ein god anledning til å treffa nye folk, seier Torunn Munthe, og dei andre nikkar bekreftande.
