Hjelmen

Hjelmen ligg i utmarka til Prestagarden, og er ei naturperle midt i Hjelmeland sentrum.

Denne markerte fjellkollen, midt i Hjelmeland sentrum, ser ut som ein hjelm frå sjøsida. Det er dette som har gitt namn til kollen, det historiske namnet til Prestagarden (Hjelmeland), og seinare namn til Hjelmeland kommune.

For å koma til Hjelmen, kan ein anten parkera ved Hjelmeland kyrkje, eller i enden av vegen i bustadfeltet Prestagardsmarka. Den merka stien til toppen går gjennom beitemarka opp i einerbakkane.

Ein liten omveg bort i eikeskogen i lia mot Steinslandsvatnet er ei fin oppleving. Her finst ein «trollskog» av store eiketre og sjeldne lavartar.

Toppunktet ligg 206 meter over havet. Utsikten er likevel best på vestsida, særleg ved et markerte utkikkspunktet (følg skilting). Ved utkikkspunktet er det laga til ein kombinert scene og gapahuk, med benker i amfi med utsikt over Hjelmeland. Her står òg statuen «Northern Winds», som er ein del av turløypa «Skulp-turen».

Like ved utkikkspunktet går det ein bratt, umerka sti mot bustadfeltet ved foten av Hjelmen. Denne stien kan òg følgjast vidare under Hjelmen, til vasstårnet ved Litle-Hjelmen. Alternativt kan ein følgja stien ned mot Prestagardsmarka igjen.

Med vanleg gangfart tar det omtrent ein times tid å fullføra denne rundløypa.